Njoftime për Shtyp

INTERVISTA TV KLAN/ Z. Llalla: Politika nuk do t’i afrohet punës së prokurorisë

Intervistë e Prokurorit të Përgjithshëm, Adriatik Llalla, dhënë gazetarit Blendi Fevziu për emisionin “Opinion” në Tv Klan,

A ishte befasues emërimi si Prokuror i Përgjithshëm? A ishte befasues propozimi që ju bënë për të drejtuar Prokurorinë e Përgjithshme?
Në fakt ishte vërtetë befasuese për mua. Unë ndodhesha në krye të Inspektoratit të Lartë të Deklarimeve të Kontrollit të Pasurive në momentin që nga zyra e Presidentit të Republikës më njoftojnë se duhet patjetër të paraqitesha në Presidencë për të diskutuar në një takim me presidentin. Takim në të cilin presidenti parashtroi kërkesën e tij nëse unë do të pranoja për të qenë Prokuror i Përgjithshëm.
Pra nuk kishin asnjë dijeni më parë se emri juaj ishte përfolur për t’u bërë Prokuror i Përgjithshëm?
Emri im qarkullonte nën zë siç qarkulluan shumë zëra por jo aq shumë publikisht. Fakt u bë në momentin kur Presidenti i Republikës më thirri dhe më komunikoi vendimin e tij.
Patët hezitim për të thënë po?
Në fakt unë vija nga radhët e Prokurorisë.
Sa kohë keni punuar në Prokurori?
Kam punuar 10 vjet prokuror. Vërtet isha mes dyzimit se kisha punën në Inspektoratin e Lartë dhe ishte në një moment kur ky institucion krijoi një emër të vetin.
Prej sa vitesh qëndronit në krye të këtij institucioni?
Prej 4 vitesh e pak muaj isha pothuajse në fund të mandatit tim, pak muaj më pas mbaronte mandati në krye të Inspektoratit dhe isha mes këtij dyzimi, por gjithsesi kërkesa për të qenë në krye të kryeprokurorit të Shqipërisë, normale që ishte një vlerësim për mua, për punën time dhe normalisht që nuk refuzova.
A ju shkoi në mendje z. Llalla që gjithë paraardhësit tuaj kanë ikur gjithmonë me gjysmëceremoni nga ajo zyrë me përjashtim të rastit të fundit që ishte relavitisht normal pra një përcjellje me një rrotacion normal?
Është e vërtetë. Ky është një opinion që diskutohej shpesh në radhët e prokurorëve që asnjë kryeprokuror tjetër gjatë këtyre viteve nuk pati mbyllur normalisht mandatin e tij. Në fakt më interesante ishte momenti kur po e ndiqnim në shtëpi me fëmijët këtë. Tv Klan jepte një histori të prokurorëve të përgjithshëm, momenti që të gjithë shkonin drejt një fundi të caktuar dhe fëmijët: “Shiko babi edhe ju kështu do përfundoni në fund të mandatit” - dhe po shihnin me hezitim edhe fëmijët kur po diskutohej kjo temë.
Patët frikë se mund të ndodhte kjo. E menduat apo jo?
Jo, nuk më shqetëson kjo pjesë. Nuk mendoj për fundin akoma, tani kam filluar dhe nuk kam arsye të mendoj për fundin.
Z .Llalla nga vini? Cili është shkollimi juaj? Ku keni lindur?
Vij nga një familje shumë e persekutuar nga diktatura komuniste. Vij nga Gramshi.
Çdo me thënë nga një familje shumë e persekutuar?
Gjyshi im është pushkatuar në vitin 1947. Im atë fillimisht u dënua me pushkatim, më pas kaloi në burgim të përjetshëm dhe bëri rreth 10-15 vjet burgim. Familja u internua për dhjetëra vite në kampe të ndryshme në Tepelenë, Berat, pra histori vuajtjesh deri në vitit 90’.
Kur patët shansin të shkolloheshit?
Fillimisht hezituan, nuk më linin as shkollën e mesme për të marrë, pas shumë peripecish arrita të merrja shkollën e mesme. Në vitin e tretë të shkollës së mesme ma ndërprenë me idenë se kisha detyrim për të shkuar ushtar, sepse kisha mbushur moshën për të shkuar ushtar, pasi nisa shkollën e mesme me vonesë. Më pas bëra ushtrinë për dy vjet dhe u ktheva bëra pjesën tjetër të shkollës. Më pas në vitin 1993 fillova arsimin e lartë në Juridik. Mbarova fakultetin dhe menjëherë pas mbarimit të fakultetit fillova punë.
Kur nuk ju jepnin të drejtën as për të vazhduar shkollën e mesme a e mendonit qoftë edhe në ëndrrat më të bukura se do të shkolloheshit edhe me arsim të lartë e do të kishit një karrierë të tillë?
Jo absolutisht, ishte e paimagjinueshme për mua. Më dukej ëndërr të shkojë në shkollën e mesme pasi e dija që të lartën nuk do të kisha asnjë shans për ta marrë.
Ishit nxënës i mirë?
Isha nxënës i mirë, përgjithësisht kështu kemi qenë, jemi katër vëllezër dhe motrat kështu kanë qenë, por historia ishte ajo që thamë.
Mbaruat universitetin në vitin...?
...në vitin 1997.
Që nga kjo kohë çfarë keni punuar?
Fillimisht fillova në Prokurorinë e Lushnjes si oficer i policisë gjyqësore. Pas një viti u titullova Prokuror po në këtë Prokurori. Në fakt kur fillova ishim një trup prokurorësh dhe oficerë të policisë gjyqësore të cilët filluam rishtazi menjëherë pas ngjarjeve të vitit 1997. Gjetëm zyrat e braktisura dhe i rregulluam vetë zyrat ambientet.
Ishte e vështirë të ishe oficer i policisë gjyqësore në Lushnje në atë kohë kur dominonin banda?
Ishte e vështirë, ishte përgjegjësi sepse në atë qytet kishte humbur besimi i njerëzve se do të kishte edhe njëherë shtet. Më pas siç e përmenda, fillova prokuror për 5 vite në këtë qytet kur për herë të parë hyja në një zyrë shteti pas mbarimit të shkollës e më pas karriera filloi normalisht. Pastaj u komandova për një vit në prokurorinë e Kavajës për një ngjarje të rëndë që kishte ndodhur në këtë qytet. Më pas u dekretova dhe u emërova prokuror i rrethit të Fierit edhe dy vjet, më tej në Tiranë për 4 vite zv.prokuror i Tiranës, kjo ishte pak a shumë karriera në prokurori. Deri në momentin kur erdhi dekretimi për në krye të Inspektoratit të Lartë të Deklarimit Kontroll të Pasurive.
Kush ju zgjodhi për të konkurruar në krye të Inspektoratit të Lartë të Deklarimit Kontroll të Pasurive?
Janë dy histori vërtet të çuditshme për mua. Edhe në atë moment ka qenë kur ish-Presidenti Bamir Topi më thërret në zyrë për të më diskutuar se unë do të isha një nga dy kandidaturat që do të konkurronin për në krye të Inspektoratit të Lartë, bashkë me kryetarin aktual të Gjykatës Kushtetuese z.Dedja.
Nuk u bëtë kuriozë se nga kishte shkuar emri juaj deri tek Presidenti, apo kishit kontakte?
Jo nuk kisha kontakte, ishte hera e parë që e takoja. Sipas informatave që mora më pas, sugjerimi kishte ardhur nga një miku im, deputet në atë kohë, banor i Lushnjes. Ai kishte sugjeruar emrin tim, njohur nga emri që ishte krijuar në qytet që nga koha kur isha prokuror në Lushnje. Kisha disa vite pa e takuar edhe atë person. Kur shkova në Kuvend isha mes hezitimit nëse duhet të lija punën e pProkurorit për të shkuar në krye të Inspektoratit apo jo.
E kishit këtë dilemë?
E kisha këtë dilemë sepse e doja këtë punë. Me punën e prokurorit fillova u mësova e më pëlqente, kushdo që largohet nga kjo punë ndien atë boshllëkun. Madje me znj. Rama, paraardhësen time rastisëm që u shkëmbyem në shkallët e Presidencës në momentin që presidenti më thirri për të komunikuar për këtë vendim të Inspektoratit.
Z.Llalla ju u propozuat nga Presidenti Topi dhe u votuat nga të gjitha forcat politike. Pse ky vendim konsensual, zakonisht në këto raste ka gjithmonë kontestime?
Kryeministri Berisha në atë moment mesa kujtoj në një mbledhje të grupit parlamentar të Partisë Demokratike, mes dy kandidaturave i kërkoi Partisë Socialiste që të zgjidhte një nga këto dy kandidaturat dhe mazhoranca do ta mbështeste. Partia Socialiste zgjodhi kandidaturën time, çka u votua në mënyrë unanime pothuajse nga të gjithë deputetët që ishin të pranishëm në sallë.
Ç’marrëdhënie keni pasur me politikën në këto kohë që keni drejtuar ILDKP?
Kam pas një distancim normal nga e gjithë politika. Pozicioni im ishte shumë delikat, edhe më delikat se ky pozicion që kam aktualisht. Të drejtoje ILDKP kishe kontakte të vazhdueshme me hierarkinë më të lartë të shtetit. Pata ruajtur raporte të distancuara nga gjithë politikanët.
Kishit politikanë që trokisnin për të fshehur pasuritë e tyre?
Realisht ndër mënyrat sesi unë e organizova punën atje nuk krijova kontakte me asnjë politikan. Ai që kontaktonte ishte gjithmonë personi përgjegjës për kryerjen e hetimeve, pra inspektori përkatës. Në raste shumë të rralla kur vinin për të përshëndetur, por jo që të kisha kontakte të drejtpërdrejta në mënyrën sesi hetoj.
Gjatë kohës që ju ishit në krye të ILDKP a pati ndonjë penalizim ose ndonjë politikan ose njeri të administratës që u dënua për falsifikim apo mosdeklarim të pasurive?
Nga viti i parë që unë shkova në krye të Inspektoratit realisht pati menjëherë një rritje të numrit të rasteve të kallëzuara të ndëshkuara në forma të ndryshme që parashikon ligji për deklarimin e kontrollit të pasurive apo ligji për parandalimin e konfliktit të interesave. Vitin e parë u kallëzuan rreth 20 zyrtarë të niveleve të ndryshme. Po kështu ritme që shkojnë në mënyrë normale të çdo vit. Pothuajse çdo vit janë kallëzuar rreth 20 zyrtarë për fshehje apo mosdeklarim të pasurisë, si dhe për falsifikim.
Z.Llalla a kishte presion politik në postin në krye të ILDKP?
Jo unë nuk kam ndjerë asnjëherë presion, këtë e them me sinqeritetin më të madh. Kjo nisur edhe me faktin që nuk i jam afruar asnjëherë politikës, pra nga pozicioni im, i distancuar nga politika. Gjatë kohës që drejtoja atë institucion kisha detyrim për të shkuar në Kuvendin e Shqipërisë për të raportuar lidhur me veprimtarinë e institucionit çdo vit.
Cilat ishin institucionet me të cilat të lidhte puna në ILDKP?
Përveç institucionit ku ne grumbullonim të dhënat në funksion të hetimeve që kryenim, kishim të dhëna dhe normalisht për të raportuar në Kuvendin e Shqipërisë, te Presidenti i Republikës në rastet kur kërkonte informacion dhe normalisht nga institucionet që ne kishim më tepër bashkëpunim ishte prokuroria, pasi të gjitha rastet, më parë do të kallëzoheshin në prokurori.
Ishin normale raportet tuaja me znj.Rama?
Raportet me znj. Rama kanë qenë normale gjatë gjithë kohës, përveç faktit se unë gjithmonë pata kundërshtuar vendimet jo të drejta të marra nga prokuroria për kallëzimet e bëra prej nesh, por kjo nuk ishte arsye të ndikonte në raportet e mia me znj. Rama. Në shumë raste kishim kontestuar vendimet e prokurorisë edhe publikisht. Pothuajse në të gjitha rastet që ne kishim kundërshtime në lidhje me vendimet e prokurorisë i patëm kundërshtuar edhe në rrugë gjyqësore edhe në shkallët e hierarkisë në prokurori edhe publikisht.
Pra prokuroria ka mbyllur çështje për të cilat ju mendonit se mund të hetoheshin e të çoheshin në gjykatë?
Po, ky është një fakt për të cilin unë kam ngritur zërin vazhdimisht në krye të inspektoratit. Ishte një ndër problemet shqetësuese të punës që neve hasnim atje, pasi prokuroria në mënyrë të vazhdueshme ka pas mbyllur shumicën e çështjeve të kallëzuara prej nesh, vendimet të cilat unë kam gjykuar dhe gjykoj që gjithmonë kanë qenë të padrejta, i kam ankimuar në të gjitha format e parashikuar nga ligji. Edhe në takimet që pata pasur në dy raste me znj. Rama për të diskutuar në lidhje më këtë çështje pata parashtruar vërejtjet e mia lidhur me këtë problem.
Do t’i rishikoni këto çështje z.Llalla tani që jeni në krye të Prokurorisë së Përgjithshme apo ligji nuk ua lejon më këtë rishikim?
Në varësi të fazës në të cilën ndodhen normalisht, pa i parë në kontekstin sikur unë këto çështje po i ndjek për një arsye të caktuar, por normalisht rastet më flagrante do t’i rishohim nëse ka mundësi për të filluar hetimet.
Si e pritët reagimin politik pas daljes së emrit tuaj si kandidat për Prokuror i Përgjithshëm i Shqipërisë?
Nga mesazhi që merrja konstatoja që emri im ishte pëlqyer nga të dyja palët politike.
Por Partia Socialiste e refuzoi emrin tuaj në një farë mënyrë, nuk votoi kundër, por abstenoi?
Këtë e gjykoj si vlerësim të Partisë Socialiste për emrin tim, por jo procesin të cilin Partia Socialiste e kishte kundërshtuar që në momentin e parë që Presidenti e thirri për të diskutuar lidhje me emrin tim.
A ka pasur kontakte nga Partia Socialiste, tentativa për t’ju kontaktuar apo për të folur me ju?
Jo, unë s’kam pasur kontakte me asnjë forcë politike për këtë rast. Nuk kam bërë fushatë nëse do të votohej apo jo për emrin tim.
Ndërkohë që votimi juaj në parlament mori një numër votash të kënaqshme, pati një votë kundër ose mungesën e një vote e cila, pavarësisht se votat janë të barabarta, ka një lloj sinjali në këtë drejtim. Kryetarja e Parlamentit, Jozefina Topalli votoi kundër. A e keni idenë se përse ka votuar kundër?
Jo, znj.Topalli nuk votoi kundër, por nuk mori pjesë në votim. Nuk kam arsye të komentoj qëndrimin e znj. Topalli, nuk i di arsyet e saj, megjithatë unë vlerësoj qëndrimin institucion të Parlamentit Shqiptar që votoi pro kandidaturës sime me shumicë thuajse absolute sepse edhe pse nuk pati kundërshtime, është hera e parë që një prokuror i Përgjithshëm zgjidhet pa kontestimet e palëve politike.
A do të keni ju aftësinë dhe a do jeni ju krejtësisht i pavarur nga politika si Prokuror i Përgjithshëm?
Unë e besoj që po. Nëse drejtuesi i institucionit nuk bën kompromise politike nuk përfshihet në çështje politike, unë kam bindjen e plotë që do të jem i pavarur nga politika. E thashë edhe më herët çështjet e inspektoratit janë shumë herë më të ndjeshme se ato të prokurorisë. Në prokurori mbi 90 për qind të rasteve nuk kanë të bëjnë me raportet politike.
Por presioni mbi prokurorinë nga gjithë eksperiencat e deri më sot është shumë më i madh për përdorje politike nga njëra apo tjetra palë.
Kjo mendoj se ndodh për faktin se prokuroria nuk ka treguar atë autoritetin e duhur dhe nuk i ka treguar vendin gjithsecilit.
Pse ju besoni se mund ta keni këtë autoritet?
Jam i sigurt që do ta kem këtë autoritet. Besoj në aftësitë e mia, në integritetin tim dhe nuk shoh ndonjë palë politike që të ketë kurajën për të bërë presion në detyrën time.
A do të jeni ju i aftë të hetoni çdo lloj politikani pavarësisht cilit spektër politik i përket nëqoftëse një çështje konkrete do të vijë në Prokurori, apo siç ndodh gjithmonë që politikanët do të jenë të pandëshkueshëm?
Pa diskutim që do të hetohet në mënyrë më të plotë, të gjithanshme dhe këtë ju siguroj ju dhe nëpërmjet jush gjithë opinionin. Ligjvënësi shqiptar ka shprehur vullnetin unanim që të heqë imunitetin për këdo zyrtar. Përfitoj nga rasti të nxis të gjithë qytetarët, të gjithë ata që kanë dijeni për raste të ndryshme të dyshuara për vepra penale që mund të kryejnë zyrtarë në rrethe të ndryshme, të denoncojnë të gjitha rastet pranë institucionit tonë, dhe i siguroj që do të ndiqen me përparësinë maksimale.
Pra ju mendoni se do të jeni i aftë të hetoni qoftë edhe zyrtarë të niveleve të mesme apo të larta nëse ata kapen në shkelje të ligjit?
Pa diskutim. Për këtë ju siguroj ju dhe këdo tjetër.
Z.Llalla çfarë do të bëni ju me ato që quhen dosjet më të nxehta, tani nuk po i përmend një nga një, por që i njohim, që janë në proces ose në fund të procesit, si do të reagoni? “21 Janari”, “Gërdeci” e shumë dosje të tjera, janë një seri dosjesh.
Do të ndiqen. Ato janë çështje që një pjesë e madhe e tyre janë në fazën e gjykimit. Normalisht do të kontrolloj veprimtarinë sesi prokurorët po i ndjekin këto çështje. Kjo është një detyrë e imja që do të ndjek ecurinë e procedimit, por janë çështje që ndiqen normalisht si të gjitha rastet e tjera.
Një nga pyetjet më shqetësuese që vjen në këtë rast është afrimi i fushatës elektorale. A do të përfshihet Prokuroria e Përgjithshme në hetimin e çështjes që lidhet me njerëz që do të jenë protagonistë në fushata të njërës apo tjetrës palë. Pra a mund të përdoret politikisht Prokuroria nga forcat politike në funksion të fushatës dhe zgjedhjeve të 23 qershorit?
Jo. Nëse prokuroria nuk vihet në shërbim të politikës, asnjëherë politika nuk ka sesi të përfitojë nga Prokuroria.
Z.Llalla thatë që keni punuar në Prokurori nga viti 1997, pothuajse për 10 vjet. Pra e njihni procesin e punës si në prokurorinë lokale ashtu edhe në qendër. Një nga problemet kryesore që prokuroria ka është niveli i lartë i korrupsionit të prokurorisë. Çfarë do të bënit ju që prokurorët të mos fusin lekë në xhep, për të mbyllur apo hapur çështje sipas interesave që dominohen në këtë rast nga ryshfetet dhe jo nga ligji?
Ky është një shqetësim i drejtë i juaji dhe i një pjese të madhe të opinionit. Për këtë qëllim që në momentin e parë që unë kam marrë drejtimin e Prokurorisë së Përgjithshme kam synuar që të forcoj drejtorinë e kontrollit të inspektimit e cila merret me kontrollin e punës së prokurorëve, shqyrton rastet e ankesave të qytetarëve njëherazi nga dje institucioni im ka vënë në dispozicion të qytetarëve një numër telefoni free dhe një adresë poste elektronike në të cilat i kërkohet çdo qytetari që të denoncojë për raste korrupsioni në radhët e prokurorëve. Ankesat do të ndiqen me përparësi, në ato rastet kur gjykohet se do të jetë e nevojshme fillimi i procedimit penal do të fillohet në mënyrën më urgjente, procedimi penal ndaj cilido prokurori e ndaj cilido titullari prokurorie për të marrë ndaj tyre nëse gjendet shkelje e ligjit masat e parashikuara me ligj. Pra kjo është e para që unë synoj të bëj. Pastrimin nga radhët e prokurorisë të elementëve që njollosin emrin e këtij institucioni.
E dini z. Llalla që shumica e prokurorëve kanë mbështetje politike nga pas?
E përmenda dhe një herë që nuk më shqetëson kjo pjesë. E rëndësishme është që ky institucion të pastrohet nga radhët e atyre njerëzve. Nuk besoj dhe nuk janë shumica. Ata janë pak individë të cilët duke përfituar nga arsye të caktuara, dalin dhe përgojojnë emrin e gjithë institucionit.
Z. Llalla duket sikur informacioni i hetimit, për aq sa kam dhe unë eksperiencë si gazetar në Shqipëri, shpesh herë kthehet në një çështje mediatike. Hetimi kthehet nga një hetim i Prokurorisë në një hetim me gjykim publik. Çfarë do të bëni ju për këtë çështje?
Ky është një problem shumë shqetësues i punës tonë, gjë e cila duhet parë në mënyrë imediate. Ligji penal parashikon sanksione ndaj prokuroreve për nxjerrje të sekretit hetimor, në të gjitha rastet. Dje ka dalë një udhëzim që u është shpërndarë të gjitha prokurorive, i cili ka ekzistuar dhe më parë duke u kujtuar që marrëdhëniet me shtypin do të mbahen në mënyrë e parashikuar me udhëzimin përkatës, pra nga zyra e Prokurorit të Përgjithshëm, me përjashtim të rasteve kur do të ketë vendime të caktuara.
Shpresoj që nuk do ta ktheni në bunker prokurorinë?
Jo absolutisht. Por hetimi është sekret dhe nuk mund të ketë asnjë të dhënë gjatë procesit hetimor. Të dhënat bëhen publike vetëm në fund dhe në ato raste kur ka interes nga publiku. Unë jam i sigurt se ky fenomen nuk ka për të ekzistuar më. Që prokurorët të dalin në intervistë duke shpjeguar dosjet, marrëdhëniet me të pandehurit, apo të tjera, ju siguroj se masat do të merren në momentin më të parë që do të konstatohet një veprim i tillë.
Dy prej prokurorëve të njohur, ai i Tiranës, z. Malaj dhe Stojani kanë dhënë dorëheqjen pak ditë më parë. Ka qenë një dorëheqje e sforcuar apo një zgjedhje e tyre?
Dorëheqja e Prokurorit të Tiranës është një veprim qytetar, që normalisht mund ta bëjë kushdo. Derisa në krye të një institucioni vjen një drejtues tjetër është normale që të punojë me një staf që ai e gjykon të nevojshëm.
Të dy këta do të vazhdojnë të mbeten prokurorë?
Jo z. Stojani nuk është larguar me dorëheqje, por në Prokurorinë e Përgjithshme unë kam bërë një riorganizim tjetër të strukturës së Prokurorisë: Drejtorinë që drejtonte z. Stojani në vijim, deri në një moment që do ta gjykoj të arsyeshme, do të drejtohet nga vetë unë.
Pra e keni marrë vetë përsipër drejtimin e kësaj drejtorie?
Po, patjetër të Drejtorisë së Hetimit.
Z. Malaj do të jetë në Prokurori?
Po.
Kush do të jetë Prokuror i Tiranës?
Shumë shpejt, sot ose nesër unë do të gjykoj për emrin përkatës, pasi të marrë dhe konsultat. Brenda këtyre ditëve, provizorisht duhet të emërohet një prokuror, pasi institucioni ka nevojë për një drejtues. Mund të jetë edhe z. Malaj. Z. Malaj ka dhënë dorëheqjen, por unë nuk kam vendosur ende për të pranuar apo jo dorëheqjen e tij.
A do ketë largime të tjera?
Veprimi i Prokurorit të Tiranës është një veprim që unë e vlerësoj dhe do të sugjeroja edhe drejtuesve të tjerë, që vullnetarisht të kryejnë këtë veprim, në ato raste kur e gjykojnë të arsyeshme. Natyrisht që unë kam ardhur me një vullnet të gjerë të mbështetjes politike dhe të opinionit dhe do të synojë arritjen e qëllimeve të mia. Është normale që unë do të punoj me një staf që unë e gjykoj të arsyeshme. Mund të jenë dhe një pjesë e këtyre që janë, por mund të ketë dhe ndryshime.
A do të ketë prurje të reja në Prokurori?
Po, numri i prurjeve është i përcaktuar.
Me çfarë kriteri?
Kriter është shkolla e magjistraturës dhe konkurrimet. Por nuk e përcaktoj unë numrin e prokurorëve. Është vendimi i Kuvendit të Shqipërisë, i cili këtë vit shtoi me 5 numrin e prokurorëve, megjithëse nevojat janë për më tepër.
Sa janë nevojat?
Numri i prokurorëve në gjithë Shqipërinë është rreth 320. Minimalisht zyra e prokurorit të Përgjithshëm ka nevojë për më tepër staf, kjo për të ushtruar kontroll dhe në prokuroritë e tjera. Me këtë staf që ka aktualisht gjykoj që nuk është i mjaftueshëm për të ushtruar kontroll në gjithë prokuroritë.
Cilat janë çështjet më të zakonshme?
Çështjet me të zakonshme janë krimet e lehta, që zënë dhe pjesën me të madhe të procedimeve. Ngjarjet e rënda mendoj se janë rreth 20 deri 30 për qind e punës.
Një nga shqetësimet e mëparshme për prokurorinë ka qenë mos komunikimi normal me Ministrinë e Brendshme dhe atë të Drejtësisë. Çfarë do të bëni ju në këtë drejtim?
Ky është një shqetësim i drejtë. Është i prokurorëve dhe vetë institucioneve për mënyrën sesi kanë funksionuar marrëdhëniet mes këtyre institucioneve. Nëse nuk do të ketë bashkëpunim mes këtyre institucioneve puna nuk mund të vijojë normalisht. Bashkëpunimi me prokurorinë është i detyrueshëm.
Çfarë raportesh keni ju me z. Halimi dhe z. Noka?
Marrëdhëniet nuk janë vetëm me ministritë, por edhe me Doganat, Drejtorinë e Policisë, Tatimet, ILDKP-në, etj.
A mbetet hetimi i korrupsionit një sfidë e prokurorisë?
E kam deklaruar se do të jetë një ndër prioritetet kryesore të punës time. Lufta kundër korrupsionit është shqetësim i vazhdueshëm për të gjithë shoqërinë shqiptare. Është fakt që korrupsioni mbase nuk është në nivelet e pretenduara edhe nga raporti i fundit të TIA, por ai gjithsesi mbetet një problem shqetësues. Kjo është detyra jonë dhe prokuroria në këtë mes ka padyshim përgjegjësinë e saj dhe është organi kryesor për ushtrimin e ndjekjes penale. Nëse do të flitet për përgjegjësi, institucioni që unë drejtoj është përgjegjësi kryesor.
Disa ditë më parë në studio kisha një panel që fliste për vrasjet në familje dhe kryesisht të grave. Një prej të ftuarve tha se shumë dosje të krimit të familje mbeten pa autor. A do të ketë hetim tjetër?
Ato janë raste që janë hetuar. Unë nuk di të flas për raste konkrete apo dhe për rastin që përmendni. Ajo që mund të them unë është se zyra ime do të jetë gjithmonë e hapur për të parë dhe riparë rastet e dyshuara të kësaj natyre.
Një nga problemet e fundit është ngërçi mes prokurorisë dhe gjykatave. Si do të përmirësohet ky raport?
Gjykata normalisht vendos në bazë të provave dhe bindjes së gjyqtarit, por nëse këto do të ndodhin për arsye korruptive, prokuroria i ka pasur, por tashmë me heqjen e imunitetit për gjyqtarët i ka të gjitha kompetenca për të hetuar çdo rast. Në hetimet e Prokurorisë nuk do të jetë një nga prioritetet kryesore të punës time për të hetuar rastet e dyshuara të korrupsionit tek gjyqtarët.
Në kohën kur institucioni drejtohej nga Ina Rama, gjyqtarët janë përgjigjur se dosjet që vinin nga Prokuroria ishin të paplota?
Nëse rastet mbyllen për arsye korruptive, nga ana jonë do të merren masat ligjore. Ato janë raste që do të shqyrtohen nëse kanë ardhur për shkakun e gjykatës apo shkakun e prokurorit.
Z. Llalla ju thatë që fëmijët tuaj kur panë specialen për eksperiencën e prokurorëve të përgjithshëm u shqetësuan. Z. Llala cila është familja juaj?
Bashkëshortja dhe dy fëmijët, kam vajzë dhe djalë.
Janë të mëdhenj?
Vajza është në klasën e tetë, vajza është në klasën e pestë.
A e dinë atë që nga ky moment do të filloni të mungoni shumë më tepër sesa më parë?
Kanë filluar që ta ndjejnë, që tek mungesa, masat e sigurisë rreth tyre, pasi nuk ishin mësuar të ishin të rrethuar nga garda dhe mënyra të tjera të sigurisë.
Ju thatë që dikur ishin një nxënës i mirë, ju ndaluan të shkonit dhe në shkollën e mesme, madje ua ndërprenë dhe ju çuan ushtar, etj. A keni mllef ndaj atyre njerëzve dhe atij sistemi që ju pengoi të realizonit ato që donit?
Ajo që kam vënë re, jo vetëm tek unë, por tek të gjithë ata njerëz që kanë vuajtur peripeci të tilla, është se nuk kanë mllef. Është e çuditshme por nuk kanë inat, ndjenjë hakmarrjeje për atë që ka ndodhur. Është një kategori e çuditshme, që nuk ka ndjenjë mllefi. E kundërta kam konstatuar që ndodh me ata që kanë qenë persekutorë. Ata edhe sot kujtojnë sikur ne kemi ardhur në vendin e tyre duke ua zënë në mënyrë të padrejtë, atë vend që mund të kishin.
U flet ndonjëherë fëmijëve të tu për atë kohë?
U flas për ta kuptuar. E diskutojmë shpesh në familje, kur mblidhemi me të afërm dhe ndonjë herë edhe vetë nuk e besojmë. Një njeri i rritur në kampe internimi dhe sot të jetë në këtë institucion vërtet që është pak e pabesueshme për mua jo më për ata. Edhe ata më shohin pak me dyshim, jam unë apo s’jam unë.
Z. Llalla po ju bëj dhe një pyetje që besoj se do t’ua bënin shumica e shqiptarëve: Nëse në detyrën tuaj do të jeni të detyruar të hetoni kryeministrin, kreun e opozitës, kryetaren e parlamentit, etj., a do të jeni i aftë që ta bëni pa ndikim?
Ju siguroj që do ta bëj pa asnjë lloj ndikimi. Këtë mesash përcjell për ju dhe për këdo tjetër që na dëgjon.
A do të jeni i aftë të hetoni këdo përpara ligjit?
Pa diskutim. Deri dje Prokuroria ka pasur vështirësi komunikimi me zyrtarët e niveleve të larta, pra zyrtarë që hezitonin apo nuk pranonin të paraqiteshin në prokurori në rastet kur kërkoheshin, apo nuk paraqiteshin provat e kërkuara, gjë e cila ju siguroi se nuk ka arsye dhe nuk do të ndodh më.
Po e përsëris: Jini i sigurt se sa kohë do jeni në krye të institucionit Prokuroria nuk do të përfshihet në beteja politike dhe s’do të përdoreni politikisht në funksion të zgjedhjeve?
Është një lloj betimi që e bëj mbi Kushtetutë, por për këtë ju siguroj që do të jem Prokuror i Përgjithshëm dhe nuk do të jem pjesë e politikës.
A do të jeni i aftë ta bëni këtë kur ata që janë vartësit tuaj mund të përfshihen në këto çështje?
Pa diskutim. Asnjë prej vartësve të mi nuk do të guxojë të përfshihet në të tilla situata, për aq kohë sa unë nuk do të përfshihem në një situatë të tillë dhe nëse do të guxojnë, ligji ka parashikimet e duhura për cilindo.
Për ju cila është sfida më e madhe personale?
Prioriteti i im është që Shqipërinë ta nxjerr nga ky batak, në të cilin gjykohet se ndodhet niveli i korrupsionit. Pra ky do të jetë prioriteti im, duke filluar nga radhët e prokurorëve për të vijuar tek ata që dyshohet se përfshihen në skema korruptive.
FUND