Njoftime për Shtyp

Prokuroria e Kurbinit ka vendosur sekuestron për 4 pasuri të paluajtshme dhe 5 automjete, në vijim të hetimit për dy procedime penale të regjistruara për “Pastrim të produkteve të veprës penale:. Këto procedime kanë nisur në bazë të informacionit të përcjellë nga Drejtoria e Policisë së Qarkut Lezhë.

Prokuroria e Dibrës dërgon për gjykim ish-kryetarin e Bashkisë, Shukri Xhelili, i akuzuar për veprën penale të “Mosdeklarim dhe deklarim i rremë i interesave private” (pasurisë), në vijim të hetimit të nisur në bazë të kallëzimit të Inspektoratit të Lartë të Deklarimit dhe Kontrollit të Pasurive (ILDKPKI). Për këtë procedim, i pandehuri është hetuar pa masë sigurimi.

Me kërkesë të Prokurorisë së Elbasanit, gjykata ka vendosur sekuestrimin e 5 apartamenteve, 9 dyqaneve dhe 2 garazhdeve, të regjistruara në emër të shtetasit I.K., dhe familjarëve të tij, në kuadër të hetimeve të nisura për veprën penale të “Pastrimit të produkteve të veprës penale...”.

Në bazë të një hetimi të Prokurorisë së Krujës, gjykata ka caktuar masën e sigurisë “arrest në burg” për ish-drejtuesin e Hipotekës së qytetit, si edhe ish-sekretarin e Komunës Thumanë, të cilët dyshohet se i kanë regjistruar në mënyrë të kundërligjshme një shtetasi, një tokë me sipërfaqe 13.300 m2.

Prokuroria e Sarandës kërkon caktimin e masës së sigurisë "arrest me burg" me afat 45 ditë, me qëllim pritjen e aktit të ekspertimit, për shtetasin E. F., i dyshuar se mund të jetë ai personi që ka goditur për vdekje me mjet lundrues "skaf" shtetasen ruse, 16 vjeç, ngjarje e ndodhur në dt. 21.07.2017 në Ksamil. Kërkesa e Prokurorisë u mbështet nga ana e Gjykatës së Sarandës.

Prokuroria për Krime të Rënda ka urdhëruar sekuestrin e 13 pasurive të paluajtshme, të përbëra nga apartamente, toka dhe troje, të regjistruara në emër të shtetasit N.J., i dyshuar nga autoritetet e Spanjës si person i përfshirë në një rrjet trafiku ndërkombëtar narkotikësh.

Me kërkesë të Prokurorisë së Elbasanit, gjykata ka caktuar masën e sigurisë “arrest me burg” për dy ish-drejtues të lartë të kompanisë “Kurum International”, të dyshuar se kanë krijuar një skemë mashtruese me rimbursimin e Tatimit mbi Vlerën e Shtuar (TVSH), me dëm ekonomik ndaj shtetit në vlerën rreth 1.5 milionë dollarë.

Prokurori i Përgjithshëm, z. Adriatik Llalla, priti në një takim drejtues të Institutit Ndërkombëtar të Sirakuzës për Drejtësi dhe të Drejtat e Njeriut, në të cilën u diskutua mbi mundësitë për trajnimin e prokurorëve shqiptarë lidhur me hetimet për krimin e organizuar, kriminalitetin ndërkombëtar dhe për marrëdhëniet juridiksionale ndërmjet strukturave të vendeve të ndryshme.

Prokuroria e Fierit përfundon hetimet dhe dërgon për gjykim 4 persona, të akuzuar se kanë vjedhur vepra arti në zonën arkeologjike të Apollonisë.